Wa makket wa? URLAND ûndersiket keunst en keunstmjittigens
Performancekollektyf URLAND boartet mei keunstmjittige yntelliginsje (AI) en stelt de fraach: wat betsjut keunst yn digitale tiden? Binne wy eins noch wol nedich? Mei klone stimmen en in script dat (diels) skreaun is troch ChatGPT giet URLAND oan ’e slach mei AI. Of giet AI oan ’e slach mei URLAND?
Formerly Known As is in surrealistyske, Blade Runner-achtige meta-foarstelling dy’t de ferskowende betsjutting fan keunst ûndersiket. De foarstelling is yn it Ingelsk.
Yn dizze eksperimintele foarstelling ûndersiket URLAND de rol fan keunst yn in digitale wrâld. Wat is keunst noch wurdich as AI ek keunst meitsje kin? Wa hat eins noch kontrôle – de minske of de masine?
It resultaat is in surrealistysk en ferfrjemdzjend teatereksperimint, fol klone stimmen en in tekst dy’t (mei help fan AI) harsels spegelet. De grins tusken echt en keunstmjittich ferdwynt. Do sjochst in kollektyf dat mei AI in foarstelling makket oer in kollektyf dat mei AI in foarstelling makket… en dat hâldt net op. In metaferhaal dat draait om de kearnfraach: wat betsjut it om minske te wêzen yn in wrâld fol technology?
De styl docht tinken oan sciencefiction-klassikers lykas Blade Runner. In tsjustere, futuristyske wrâld dêr’t alles mooglik liket. Tagelyk is it humoristysk en boartlik, mei skerpe observaasjes oer ús tiid. AI is oeral: yn ús telefoans, yn keunst, yn it deistich libben. Mar wat as it ús plak ynnimt as makker?
De foarstelling stelt fragen sûnder antwurden foar te lizzen. Is dit keunst of kin it fuort? Wat bart der as wy it ferskil net mear sjogge tusken echt en nep? En as kreativiteit net mear minsklik unyk is – wat makket ús dan noch bysûnder?
URLAND boartet mei dizze tema’s op in wize dy’t dy oan it tinken set. Se nimme dy mei yn in wrâld fol betizing, werkenning en ferrassingen. Miskien herkenst dysels yn de makkers – of yn de twifels dy’t se sjen litte. En wa wit, miskien stapst de seal wol út mei in folslein oare blik op technology en skepping.Formerly Known As is in foarstelling oer de botsing tusken skepper en skepping, tusken minske en masine. Spannend, yntelligint en soms betiizjend – mar net ien dy’tst maklik ferjitst.
Dizze foarstelling is ûnderdiel fan SHIFT, in inisjatyf fan Explore the North en Stadsschouwburg De Harmonie.
Ungepoleiste poadiumkeunsten: rau, earlik, aktueel en fersteurend. By SHIFT komst om’tst witte wolst wat der spilet: yn dyn holle, yn ‘e wrâld, mei de oar, mei dysels, op makro- en mikronivo. Foar nijsgjirrige tinkers en krityske dreamers. It hiele jier troch fynst hjir op wikseljende lokaasjes foarstellingen dy’tst sjoen hawwe moast, bûten de fêstleine paden fan it teater. Fan spoken word oant postmoderne dûns. Fan teatraal pamflet oant poëtysk rekwiem. It binne foarstellingen fan jonge én mear fêstige makkers dy’t hjoeddeistige ûnderwerpen oansnije en nei de takomst sjogge.